يايسله يكتب التاريخ الأهلي بطل آسيا والمدرسة الألمانية ترجع من جديد
ماتياس يايسله، المدرب الألماني الشاب، قدر يدخل التاريخ من أوسع أبوابه بعد ما قاد فريق الأهلي السعودي للتتويج بلقب دوري أبطال آسيا للنخبة، بفوز مهم على كاواساكي الياباني بنتيجة 2-0 في النهائي وده أول لقب آسيوي لمدرب ألماني من سنة 2007، لما أوسييك فاز مع أوراوا الياباني!
يايسله مسك تدريب الأهلي من موسم 2023-2024، ورغم إنه ما حققش أي بطولة محلية مع الفريق، إلا إنه فاجأ الجميع في أول مشاركة قارية ورفع الكأس الأغلى في آسيا، وكأنه بيقول “أنا هنا”!
الأرقام معاه كمان مش قليلة، لعب مع الأهلي 80 مباراة، فاز في 50، وتعادل في 13، وخسر 17 ولكن الإنجاز الحقيقي كان في دوري أبطال آسيا، 13 مباراة بدون هزيمة، 12 فوز وتعادل وحيد، وسجلوا 34 هدف واستقبلوا 10 بس أرقام بطل بمعنى الكلمة.
من 2003، البطولة خدت شكل جديد، وشفنا تسعة مدربين أوروبيين يرفعوا الكأس، لكن يايسله هو أول ألماني يعملها من وقت طوووويل، وده بيأكد إن المدارس التدريبية الأوروبية، وخاصة الألمانية، لسه عندها كتير تقدمه حتى في القارة الآسيوية.
واللي يميز الأهلي مع يايسله مش بس الفوز، لكن طريقة اللعب والانضباط والتكتيك، وكلها حاجات خلت الفريق يبان بشكل قوي قدام أي خصم.
واضح إن مشروع الأهلي مع يايسله بدأ يجيب نتايجه، والسؤال اللي الكل بيسأله دلوقتي: هل ده بداية لهيمنة قارية جديدة للأهلي؟
