فينيسيوس وتراجع التأثير صافرات البرنابيو بدأت تقول كفاية!
فينيسيوس جونيور، النجم البرازيلي اللي كان بيسحر جماهير البرنابيو الموسم اللي فات، بقى دلوقتي بيتلقى صافرات استهجان كل ما لمس الكورة تقريبا، زي ما حصل في ماتش سيلتا فيغو اللي اتلعب على أرض ملعب سانتياغو برنابيو.
الصافرات دي ماجاتش من فراغ الراجل فقد الكورة أكتر من مرة، وساب التغطية الدفاعية في لحظة كانت حرجة جدًا، وده خلى جمهور الريال يتنرفز، خصوصًا إنهم متعودين على مستوى تاني خالص من فيني.
رغم إنه بيحاول يعمل فرق بمراوغاته، بس للأسف، الحِدة اللي كانت بتميزه قلّت، وبقى تحس إن تحركاته مالهاش نفس الفاعلية أو الخطورة اللي كان بيعملها السنة اللي فاتت.
ووسط كل ده، بدأ الناس تسأل: هو فينيسيوس لسه قادر يلاقي نفسه في الفريق؟ ولا وجود مبابي اللي بيلمع بقوة بدأ يخطف منه الأضواء والدور كمان؟ فيه كلام كتير عن تأثير وجود كيليان على تحركات فيني ومكانه في الملعب، وهل فعلاً ده سبب في تراجع مستواه؟
اللي واضح إن الجماهير بدأت تفقد صبرها، وسؤال واحد بيزيد كل يوم: هل فيني هيرجع لمستواه المعهود؟ ولا خلاص الدور الرئيسي في الهجوم راح لمبابي؟
