مدرب إنتر حاطط عينه على يامال وبيحذر من برشلونه القوي
اتكلم سيموني إنزاجي مدرب إنتر ميلان عن ماتش العوده اللي هيجمعه مع برشلونه في دوري الأبطال، بعد ما انتهت مباراه الذهاب بتعادل مجنون 3-3، وقال إن المواجهه الجايه يوم التلات في ملعب سان سيرو هتكون حماسيه جدًا.
إنزاجي في المؤتمر الصحفي قال إنهم هيحاولو يمنعو الكوره توصل ليامال، بس بصراحه ده صعب جدًا، لإنه لاعب موهوب وسريع في تفكيره، وكل الفريق بيمرر له. وقال كمان إنهم هيراقبوه كويس لإنه خطر فعلاً.
كمل إنزاجي وقال إنهم مش عارفين لسه ليفاندوفسكي هيلعب ولا لأ، بس في كل الاحوال برشلونه فريق قوي، سواء بلعب ليفا أو من غيره، وإنهم فازو بخمس اهداف في تلات مباريات من غيره وقال كمان إن فيران توريس لعب ماتش الذهاب كويس جدًا.
أما عن لاوتارو، فقال إن حالته هتتحسم بعد تدريب اليوم، ولو مقدرش يبدأ أساسي مش هيفيد الفريق في آخر الماتش.
وختم إنزاجي وقال إن الفريق مستني الماتش بفارغ الصبر، وكلهم مؤمنين بالفوز، وإن إنتر دلوقتي قريب من لقب محتمل بعد ما كان في المركز ١٦.
