فوزي فسخ عقد الإيجار تلقائي لو البرلمان معّدلش القانون
أكد المستشار محمود فوزي، وزير المجالس النيابيه والتواصل السياسي إن عدم إصدار مجلس النواب لتعديلات جديده على قانون الإيجارات القديمه وعدم الاعتداد بحكم المحكمة الدستورية العليا معناه إن العقد بين المالك والمستأجر هيتفسخ تلقائي وهيبقى الحكم نافذ بدون رجعه.
وقال فوزي الحكم لسه مش نافذ دلوقتي، لكن هيتنفذ تاني يوم بعد انتهاء دور الانعقاد الحالي لمجلس النواب وده بحسب حكم المحكمه الدستوريه العليا.
الكلام ده جه بعد ما النواب رفضوا الإحصائيات اللي قدمها الجهاز المركزي للتعبئة العامه والإحصاء بخصوص عدد الوحدات المؤجره بنظام الإيجار القديم، وقالوا لازم يبقى فيه أرقام مظبوطه قبل ما نقرر أي حاجه.
النائب عبدالمنعم إمام تساءل هل ممكن الجهاز يقدر يعمل حصر دخل وإنفاق لـ 6 مليون مواطن مرتبطين بالقانون ده؟ ولو ينفع في كام شهر نخلصه؟ عشان نحدد موقفنا.
اجتماع اللجنه المشتركه النهارده كان لمناقشة قانون الإيجارات القديمه اللى مقدم من الحكومه، وبيضم لجان الإسكان والمحليات والدستوريه والتشريعيه، لكن الجدل لسه داير ومفيش قرار نهائي لحد دلوقتي.
