أرنولد يقرب الرحيل لفاسكيز ومودريتش ريال مدريد يفكر ببدائل
يبدو إن انتقال ترينت ألكسندر أرنولد من ليفربول لريال مدريد، ممكن يسبب أزمة للبعض داخل النادي الملكي، وخصوصًا للاعبين الكبار زي لوكاس فاسكيز ولوكا مودريتش.
حسب موقع “Relevo”، القرار بشأن مستقبلهم مع الريال كان متخذ من سنة تقريبا، وقت ما عرض عليهم النادي تجديد لموسم 2024/25.
اللاعبين وقعوا وقتها وهم عارفين إنهم بيكملوا على الأقل لحد ما تخلص بطولة كأس العالم للأندية اللي بتقام في أمريكا، وده هيكون في نص يوليو الجاي.
لحد دلوقتي، مافيش قرار نهائي بخصوص تجديدهم، والنادي ما استبعدش أي سيناريو، لكن في شوية شكوك حوالين استمرارهم.
التقرير كمان قال إن فاسكيز جاله عروض من أندية تانية، وبيفكر فيها جدياً، خصوصاً مع قرب وصول أرنولد اللي هيكون منافس مباشر له في مركزه.
أما مودريتش، فقراره هيعتمد غالبًا على رغبة النادي، لكن حالياً الموقف واقف.
ريال مدريد متعود إنه يأجل الحسم في القضايا دي، فكل حاجة هتتحدد بعد نهاية الدوري.
بس من اللي باين، فرص فاسكيز في البقاء بدأت تقل مع كل خطوة قرب أرنولد من مدريد.
