أرنولد بيودع ليفربول وانتقاله لريال مدريد قرب يبقى رسمي جدًا
ترينت ألكسندر أرنولد أعلن امبارح إنه هيسيب ليفربول بعد ما قضى 20 سنه جوه النادي، من وهو في الأكاديميه لحد ما بقى نجم ف الفريق الأول وده خلا موضوع انتقاله لريال مدريد مسألة وقت بس.
عقد أرنولد بينتهي مع ليفربول في 30 يونيو 2025 بس دلوقتي في كلام عن إنه ممكن ينضم للريال قبل كده علشان يشارك معاهم في كاس العالم للأندية اللي هيتلعب يوم 15 يونيو الجاي في أمريكا.
ريال مدريد متواجد في المجموعه التامنه مع الهلال السعودي وسالزبورج وباتشوكا وعايزين أرنولد يكون معاهم ف البطوله، وعلشان كده، حسب سكاي سبورتس في مفاوضات شغاله دلوقتي بين الريال وليفربول.
صحيفه آس الإسبانيه قالت إن في 3 حاجات لازم تحصل علشان أرنولد يشارك ف المونديال أول حاجه يتنازل عن مرتبه في شهر يونيو، وتاني حاجه ريال مدريد يدفعله المرتب وتالت حاجه يدفع الريال مليون يورو لليفربول كقيمة رمزيه علشان الصفقة تخلص.
