رئيس الاتحاد الإسباني: التحكيم هيتغير ورئيس جديد في الطريق قريب
في تصريحات مهمه جدًا خرج بيها رافائيل لوزان، رئيس الاتحاد الإسباني، أكد فيها إن التغيير داخل منظومة التحكيم قرب جدًا، خصوصًا فيما يخص منصب رئيس لجنة الحكام اللي بيشغله دلوقتي ميدينا كانتاليخو.
لوزان قالها بصراحه: “لازم نعيد ترتيب البيت من جوه، والتحكيم محتاج هيكل تنظيمي جديد يكون على قد مستوى الكره الإسبانيه” وأكد إن تعيين رئيس جديد للجنه الحكام مش هيكون قرار فردي، بالعكس لازم يكون باتفاق وتوافق بين كل الأطراف.
وقال كمان: “مش هفرض شروط على حد، الرئيس الجديد لازم يكون عنده دعم كامل ومشروط من الكل، علشان يشتغل براحة وشفافيه”.
ووجّه كلمه مهمه للناس والجماهير: “الحكام بشر، وهيفضلوا يغلطوا، بس ده مش معناه نهاجمهم طول الوقت ولازم نديهم التقدير ونساعدهم يطوروا بدل ما نقعد نشكك فيهم دايمًا.”
كلام لوزان جاي في وقت حساس، خصوصًا بعد كم الانتقادات اللي طالت التحكيم في الدوري الإسباني في الفتره الأخيره، ومع تصاعد الجدل حوالين قرارات في مباريات كبيره، زي الكلاسيكو وغيرها.
دلوقتي الكل منتظر يشوف مين اللي هيمسك المنصب، وهل فعلًا التغيير ده هيحصل ولا لأ بس المؤكد إن التحكيم الإسباني داخل على مرحله جديده، ممكن تغير كتير في شكل اللعبه داخل الملاعب.
