عودة مفاجئة اسعار الذهب اليوم في مصر وسط توقعات بارتفاع عيار 21 إلى 4720 جنيهاً
وسط حالة من الترقب في السوق المصرية، عادت أسعار الذهب للارتفاع بشكل لافت من جديد، بعد فترة قصيرة من التراجع النسبي خلال الأيام اللي فاتت التجار والمواطنين رجعوا للحديث عن التغيرات المفاجئة اللي بتحصل كل يوم في سعر الذهب، وده في ظل ارتفاع الأوقية عالميًا وضعف الدولار، واستمرار قلق الأسواق من قرار الفيدرالي الأمريكي بخصوص أسعار الفائدة الناس اللي بتتابع السوق بقت محتارة، خاصة وإن الأسعار في البلد بتتغير أكتر من مرة في اليوم، والكل بيدور على فرصة كويسة للشراء أو البيع.
أسعار الذهب في السوق المصري اليوم
بحسب تقرير منصة آي صاغة المتخصصة في تداول الذهب والمجوهرات أونلاين، سجل سعر الجرام عيار ٢١ النهاردة حوالي ٤٧٢٠ جنيه، يعني ارتفع عن سعر الأسبوع اللي فات بحوالي ٨٥ جنيه مرة واحدة وكمان الأوقية ارتفعت بحوالي ٧٧ دولار وسجلت ٣٣١٨ دولار المدير التنفيذي للمنصة سعيد إمبابي قال إن باقي الأعيرة شهدت صعود واضح، وده كان ملحوظ اليوم في سوق الصاغة وانعكس على حركة البيع والشراء، خاصة للناس اللي بتتبع الأخبار وقرارات الفيدرالي الأمريكي.
| العيار | السعر بالجنيه |
|---|---|
| عيار ٢٤ | ٥٣٩٤ |
| عيار ٢١ | ٤٧٢٠ |
| عيار ١٨ | ٤٠٤٦ |
| عيار ١٤ | ٣١٤٧ |
| الجنيه الذهب | ٣٧٧٦٠ |
التقرير الأسبوعي لمنصة آي صاغة وضح إن أسعار الذهب في مصر تراجعت الأسبوع اللي فات بنسبة ٢.٩٪ تقريباً، كان الجرام عيار ٢١ بدأ الأسبوع على سعر ٤٧٧٥ جنيه وبعدها نزل لحد ٤٦٣٥ جنيه، لكن النهاردة الأسعار رجعت وارتفعت بشكل قوي. أما الأوقية العالمية فنزلت الأسبوع اللي فات من ٣٣١٩ لـ ٣٢٤١ دولار قبل ما تعاود الصعود.
شعبة الذهب في اتحاد الصناعات المصرية أوضحت قبل كده إن السبب في القفزات المستمرة لأسعار الذهب يرجع لحالة التوتر السياسي وردود فعل الدول الكبرى على مستوى العالم رئيس الشعبة إيهاب واصف أكد إن المعدن الأصفر حقق من أول السنة ٢٨ رقم قياسي عالمي جديد، منهم ١٦ رقم فوق الثلاث تلاف دولار للأوقية وأشار إن رغم الانخفاضات البسيطة اللي بتحصل، لكنها مش كافية نقول إن السوق رجع للاستقرار، لأن الارتفاعات كانت ضخمة ومش محسوبة بالمنطق الاقتصادي التقليدي.
وبيوضح واصف إن المستثمرين بيهربوا للذهب كل مره العملة تبقى مش مستقرة، وده طبيعي في ظل الخوف من انخفاض قيمة الدولار وكمان مع زيادة طلب البنوك المركزية العالمية على الذهب، علشان كده الذهب دايمًا بيبقى الملاذ الآمن للناس اللي عاوزة تحافظ على قيمة أموالها في الظروف دي.
