حقيقة اتفاقية كيزاد شرق بورسعيد بين المنطقه الاقتصاديه وامارات
في كام موقع وصفحه كده طلعوا بيتكلموا عن اتفاقية كيزاد اللي اتعملت بين الهيئه العامه للمنطقه الاقتصاديه لقناة السويس ومجموعة مواني ابو ظبي، وقالوا كلام كتير غلط وملوش اساس من الصحه، وعشان كده الهيئه حبت توضح الموضوع للناس.
اول حاجه الاتفاقيه دي مالهاش علاقه خالص بالممر الملاحي لقناة السويس، دا بيخص هيئه تانيه خالص وهي الهيئه العامه لقناة السويس، غير اللي عملت الاتفاقيه والاتنين مش نفس الهيئه اساساً!
تاني حاجه، المشروع نفسه مساحته 20 مليون متر مربع، جوه منطقة شرق بورسعيد الصناعيه، ومفيش اي علاقه بينه وبين ميناء شرق بورسعيد زي ما الناس بتقول والمشروع صناعي لوجستي مش بحري ولا مينا ولا حاجه من دي.
وثالث نقطه، الاتفاق اللي اتعمل هو بنظام “حق انتفاع” يعني مش بيع ولا حاجه، ودا نفس النظام اللي بيشتغلو بيه مع باقي المستثمرين، ودا قانوني تمام وبيحكمه قانون رقم 83 لسنة 2002 وتعديلاته.
رابع حاجه والاهم، مجموعة مواني ابو ظبي هتقوم بتطوير وتشغيل المنطقه الصناعيه دي كمطور صناعي، يعني هي اللي هتجهز المكان وتعمل البنيه التحتيه جوه زي الكهرباء والصرف وغيره، وكمان هتسوق للمشروع عشان تجيب استثمارات وصناعات جديده.
المرحله الاولى من المشروع هتكون على 2.8 كم مربع وهتخلص مع نهاية سنة 2025، ولسه باقي المراحل هتيجي بعد كده.
المشروع كمان هيكون فيه حاجات خدمية للعمال والإداريين زي وحدات سكن ومدارس ومستشفيات ومراكز تدريب، وده كله عشان يبقى فيه مجتمع صناعي متكامل ينفع المنطقه وسيناء كلها.
والفايده مش بس في المشروع نفسه، دي كمان هتنقل صناعه وتكنولوجيا جديده لمصر، وهتوفر شغل كتير سواء مباشر او غير مباشر، وكمان هتزود دخل الدوله من جمارك وضرائب وغيره، وكمان هتزود التصدير والتجاره العابره.
وفي النهايه، المكتب الإعلامي للهيئه الاقتصاديه حذر من نشر اي معلومات غلط وطلب من الناس تتأكد من الصفحات الرسميه بتاعة الهيئه او موقعها الرسمي عشان يعرفوا الصح من الغلط.
