الرقابة المالية تحذر من شركات تدعي بيع الذهب للمواطنين بشكل مباشر
أكدت الهيئة العامة للرقابة المالية إنها ما بتمنحش تراخيص لبيع الذهب مباشرة للمواطنين وقالت الهيئة في بيان رسمي إنها رصدت مؤخرًا بعض الشركات اللي بتدعي إنها مرخصة من قبلها لبيع الذهب، وده كلام عاري تمامًا من الصحة والهيئة أكدت إن التراخيص اللي هي بتمنحها هي فقط لوثائق صناديق الاستثمار المرخصة، واللي عددها دلوقتي 3 صناديق فقط.
الهيئة أوضحت إن الاستثمار في الذهب بشكل قانوني بيتم فقط من خلال صناديق الاستثمار المعتمدة واللي بتشرف عليها الهيئة، مش من خلال الشركات اللي بتبيع الذهب بشكل مباشر وذكرت إن الصناديق دي هي: صندوق AZ-Gold لشركة أزيموت، صندوق الأهلي لإدارة الاستثمارات المالية، وصندوق بلتون-Evolv للاستثمار في الذهب.
وكشفت الهيئة إن في حوالي 200 ألف مواطن بيستثمروا في الذهب من خلال الصناديق دي بقيمة 2.1 مليار جنيه والهيئة حذرت المواطنين بضرورة توخي الحذر من الشركات اللي بتستغل اسمها، ودعتهم للتحقق من التراخيص الرسمية قبل الدخول في أي استثمار.
وأكدت الهيئة إن الاستثمار في الذهب بيتم فقط وفقًا لقانون سوق رأس المال رقم 95 لسنة 1992، واللي بيحدد ضوابط صارمة لحماية أموال المستثمرين في هذا المجال.
