وزارة التجارة تحدد 5 حقوق أساسية لازم تكون في فاتورة التسوق الإلكتروني
وزارة التجارة أكدت في أنفوجرافيك توعوي جديد على 5 حقوق أساسية لازم يتأكد منها المتسوقين لما يتسوقوا عبر التجارة الإلكترونية، علشان يكون عندهم حماية كاملة عند التسوق ولو هتشتري حاجة أونلاين، لازم تبقى فاهم حقوقك كويس عشان ما تقعش في مشاكل بعد كده.
أول حق هو إن الفاتورة لازم تكون قابلة للحفظ، يعني تقدر تحتفظ بيها وتسترجعها في أي وقت وكمان لازم تكون الفاتورة فيها تأكيد على إتمام العقد وتاريخه، يعني لو في أي مشكلة، تقدر تثبت إنك اشتريت المنتج في التاريخ الفلاني.
وتاني حق مهم هو إن الفاتورة لازم تحتوي على إجمالي سعر المنتج، وطبعا معاياها أجور التوصيل، والضريبة، علشان تبقى فاهم تمامًا أنت دفعت كام في النهاية ولازم كمان يكون في الفاتورة ترتيبات الدفع والتسليم علشان تعرف ازاي هتدفع وإمتى هيوصل لك المنتج.
ثالث حق هو تحديد تاريخ تسليم المنتج ومكانه. لازم الفاتورة تبينلك إمتى هيوصل لك المنتج وأين هيوصل، علشان لو حصل تأخير أو مشكلة تقدر تتابع الموضوع بسهولة.
أما لو في ضمان للمنتج أو خدمات ما بعد البيع، لازم تكون موجودة في الفاتورة. يعني لو احتجت تتصل بهم بعدين علشان صيانة أو خدمة ما بعد البيع، تكون عندك كل التفاصيل.
الحق الخامس، وهو إنك لازم تكون على علم بسياسة الاستبدال والاسترجاع للمنتج ووزارة التجارة أكدت إن دي نقطة مهمة، لأنك ممكن تشترى حاجة وتقرر إنها مش مناسبة لك بعد ما توصل، فلازم تعرف إزاي تسترجع أو تبدل المنتج ده لو حصل أي مشكلة.
