972 يوم من الهيبة في جوزيبي مياتزا هل يقع برشلونة في الفخ؟
الليله ملعب جوزيبي مياتزا هيفور نار، وإنتر ميلان داخل المواجهة قدّام برشلونة وهو شايل رقم مرعب ورا ضهره ممكن يساعده يعدّي لنهائي دوري الأبطال.
موقع “لايف سكور” كشف إن الإنتر ماخسرش ولا ماتش على ملعبه من 972 يوم! تخيل الرقم؟ يعني 15 مباراة متتاليه في دوري الأبطال على أرضهم من غير ولا هزيمة، وده رقم مش سهل أبدًا وبيعكس قد إيه الإنتر بيكون شرس جدًا لما بيلعب قدّام جماهيره.
المدرجات هتكون مولعة، والجمهور الإيطالي مش هيسيب لاعب من غير ما يشحنه بطاقة الفوز وده كله بيزود الضغط على برشلونة اللي داخل على معركة حقيقية، خصوصًا إن نتيجة الذهاب مش كانت فاصلة.
إنتر داخل اللقاء مش بس بثقة الأرض والجمهور، لكن كمان بثقة الأرقام، وده بيدّي الفريق دفعة نفسية كبيرة. بس برضو الكورة دايمًا فيها مفاجآت، وبرشلونة معروف إنه بيعرف يقلب الطاولة في أي لحظة.
فهل الأفاعي هتكمل المسيرة وتعض برشلونة؟ ولا الكتالونيين هيكسروا السلسلة؟ ساعات قليلة ونعرف مين هيوصل للنهائي الكبير.
