الهلال بيقرب من ماركو سيلفا مدرب عنده خبره ودوريات كبيره
واضح إن إدارة نادي الهلال ناويه تدخل كاس العالم للأندية بشكل مختلف، وده باين من قربها من التعاقد مع المدرب البرتغالي ماركو سيلفا، اللي عنده سجل تدريبي محترم جدًا في أوروبا.
ماركو سيلفا بدأ مشواره التدريبي سنة 2011 بعد ما اعتزل الكوره، وحقق إنجاز كبير مع فريق إستوريل برايا، لما طلع بيهم للدوري البرتغالي الممتاز ووصل بيهم للدوري الأوروبي، وده بحد ذاته إنجاز لفريق مش كبير.
بعدها راح سبورتينج لشبونه وخد معاهم كأس البرتغال، بس اختلف مع الإداره ومشي، ورجع يحقق نجاحات تانيه في اليونان مع أولمبياكوس، وفاز معاهم بالدوري في موسم 2015-2016.
ومن هناك دخل على الدوري الإنجليزي، ودرب هال سيتي وواتفورد، وبعدين إيفرتون، اللي عمل معاهم موسم كويس لحد ما أقيل لأسباب فنيه.
في 2021، استلم تدريب فولهام، وفعلاً رجّعهم للدوري الممتاز بعد ما فاز معاهم بالتشامبيونشيب، وقدّم موسم ممتاز بعد كده واحتل المركز العاشر، ودلوقتي هو في المركز الـ11 بـ51 نقطه بعد 35 جوله.
واضح إن الهلال بيدوّر على مدرب عنده شخصيه وخبره أوروبية تقيله، وسيلفا ممكن يكون الإسم المناسب لو عايزين يحققوا حاجه كبيره في كاس العالم للأنديه.
