النصر بيحاول يخلص صفقة ماركينيوس قبل ما يخطفه حد تاني
واضح إن نادي النصر ماعندوش نية يضيع وقت في الميركاتو الجاي، لأن التقارير اللي طلعت بتأكد إن الإدارة بدأت تكلم المدافع البرازيلي ماركينيوس بشكل جدي علشان ينضم للفريق واللي متابع كورة كويس عارف إن ماركينيوس من أحسن المدافعين في العالم، وبيقدم مستويات ثابته مع باريس سان جيرمان بقاله سنين.
الفرنسيين حاطين سعر بيع اللاعب بين 40 و50 مليون يورو، وده رقم كبير شوية، بس واضح إن النصر ناوي يدفع علشان يقوي دفاعه ويقفل الملعب كويس، خاصة بعد المشاكل اللي واجهها الموسم اللي فات في الخط الخلفي.
النصر شايف إن ماركينيوس ممكن يكون الحل المثالي، ووجوده جنب اللاعبين اللي عندهم دلوقتي هيخلي الفريق أقوى وأكتر توازن وده غير إن اللاعب عنده خبرة أوروبية كبيرة، وده ممكن يفرق جامد في البطولات الآسيوية والمحلية.
لو الصفقة دي تمت، النصر هيكون ضرب ضربة معلم، وممكن تبقى من أقوى صفقات الموسم في الدوري السعودي وبس لسه مفيش حاجة رسمية، ولسه منتظرين نشوف إذا كانت المفاوضات هتمشي في السكة الصح ولا لأ.
