الحكومه توافق على لائحة صندوق تحسين خدمة مستشفيات الصحه النفسيه
وافق مجلس الوزراء بشكل رسمي على اللائحه الخاصه بصندوق تحسين الخدمه في مستشفيات ومراكز الصحه النفسيه وعلاج الإدمان، التابعه للأمانه العامه للصحه النفسيه بوزارة الصحه والسكان.
اللائحه دي بتهدف لتطوير خدمات العلاج النفسي، سواء كان في تقديم العلاجات الدوائيه، أو الجلسات النفسيه الفرديه والجماعيه، وكمان جلسات تنظيم إيقاع المخ، وتأهيل الحالات اللي عندها إضطرابات سلوكيه مختلفه وكمان بتشمل تقديم الإستشارات النفسيه للمواطنين عن طريق التليفون أو المنصه الإلكترونيه، مع عمل دراسات وابحاث بخصوص الأمراض النفسيه والإدمان.
ومن ضمن البنود، اللائحة بتنص كمان على تشكيل مجلس إدارة للصندوق، دوره إنه ينفذ السياسات العامه لوزارة الصحه، ويخطط لأنشطة الصندوق، ويشوف الميزانيه والمركز المالي، ويعمل التعاقدات اللي تساعد على تنمية موارد الصندوق كمان بيتم إعداد برامج تدريبيه للعاملين في المراكز والمستشفيات عشان يرفعوا كفاءتهم، وكمان تدريب الطلبه والخريجين من الكليات والمعاهد الحكوميه والخاصه.
دي خطوه مهمه بتعكس إهتمام الدوله بمجال الصحه النفسيه وبتحسين جودة الخدمه اللي بياخدها المرضى.
