تشغيل التأمين الصحى بأسوان أول يوليو والخدمه تتوقف للي مش دافع
وافق مجلس الوزراء بشكل رسمي على بدء التشغيل الفعلي لنظام التأمين الصحي الشامل في محافظة أسوان، وده هيبدأ من يوم 1 يوليو 2025، يعني خلاص العد التنازلي بدأ، لكن في نفس الوقت حددوا إن الخدمه الصحيه الغير طارئه هتتوقف عن الناس اللي مش مسدده الإشتراكات بداية من 1 يناير 2026.
القرار جاي بعد ما المحافظه بقت جاهزه لتطبيق المنظومه، وضمن خطة الحكومه اللي شغاله على تشغيل التأمين الشامل في كل المحافظات، وكان متطبق قبل كده في بورسعيد، والأقصر، وجنوب سينا، والسويس والإسماعيلية.
وبحسب القرار، الناس اللي مش هتدفع هتفضل تتلقى الطوارئ بس، لكن أي خدمات تانيه مش هتكون متاحه ليهم بعد 6 شهور من التشغيل، واللي بعد كده هيتقلل لـ 3 شهور في المرحله الجايه.
الخطوه دي من ضمن سعي الدوله لتخفيف أعباء العلاج عن كاهل المواطن، وضمان استمرارية المنظومه مالياً والقرار جه بعد موافقة الهيئات المعنيه كلها بالتأمين والرعايه والرقابة.
أسوان كده بتكمل باقي المحافظات في المرحله الأولى، والمواطنين لازم يجهزوا نفسهم للتسجيل وسداد الإشتراكات قبل بداية 2026.
