انتر ميلان يسرق الحلم من برشلونه في سيناريو شبه راموس
الحلم كان قريب، قريب أوي بس في لحظه، كل حاجه راحت وبرشلونه كان ماسك الماتش، وقريب جدًا من التاهل لنهائي دوري أبطال أوروبا، بس إنتر ميلان كان ليه رأي تاني، وسحب البساط في آخر اللحظات.
الإنتر جاب هدف قاتل، حرفيًا قاتل، خلّى الكل يفتكر لقطة راموس قدام أتليتكو مدريد في نهائي ٢٠١٤، لما سجّل في الدقيقه ٩٣ وقلب التاريخ ونفس الإحساس، نفس القهر، ونفس الوجع اللي حسه جمهور برشلونه لما شاف الكره بتسكن الشباك في الثواني الأخيره.
الناس كانت بتحلم بالمجد، برجوع الهيبه، بالنهائي الأوروبي بعد سنين من الغياب وبس السيناريو ماكانش في صالح الكتلان، والإنتر عرف يخطف التاهل من قلب الكامب نو، أو بمعنى أصح من قلب الحلم.
المدرجات سكتت، اللعيبه وقعوا أرضًا، والجمهور ماسك راسه مش مصدق اللي حصل وماتش كان فيه كل حاجه: قتال، أهداف، دموع، وآخره لحظه حسمت كل حاجه.
المؤلم بجد إن الفريق لعب، وحاول، وقدم كل حاجه بس لحظه تشتت، لحظه واحده بس كانت كفيله تضيع تعب موسم كامل.
الكره قاسيه، خصوصًا لما تكون الحظوظ كلها في إيدك وتضيعها في آخر ثانيه وبس زي ما قالوا زمان: “هي دي الكوره”، يوم ليك ويوم عليك والمهم دلوقتي، إزاي الفريق هيقوم من الصدمه دي، ويستعد للّي جاي.
