برشلونة طالع من معركة الإنتر سليم بس رايح للكلاسيكو منهك
برشلونة خلص ماتش الإنتر من غير إصابات، وده كان خبر حلو للجمهور، بس الحقيقة اللي مش قادرة تتخبّى، إن الفريق طالع من المعركة دي وهو “ميت تعب”.
ماتش الإنتر في دوري الأبطال كان ملحمة بكل معنى الكلمة، اللاعبين أدّوا اللي عليهم وزيادة، بس ده كان على حساب مجهودهم البدني والذهني، خصوصًا بعد موسم طويل ومضغوط ماتش ورا التاني، وسفر ومعسكرات.
هانزي فليك لسه عنده أمل كبير في الكلاسيكو، بس السؤال اللي بيطرح نفسه: هيقدر يواجه ريال مدريد بنفس القوة؟
يعني برشلونة رايح يلعب ضد غريمه التقليدي وهو مرهق، مش ناقص لعيبة، بس ناقص طاقة، وده في الكلاسيكو ممكن يكون الفرق بين الفوز والخسارة ولأن زي ما بنعرف، الكلاسيكو مابيستناش، وأي غلطة أو ضعف بيتحاسب فورًا.
التقارير الطبية قالت إن مفيش إصابات، بس الحقيقة إن الإرهاق مابيظهرش في الأشعة، الإرهاق بيبان في آخر 20 دقيقة من الماتش لما رجلك ماتعدش طايعاك.
الجمهور مستني من فليك المعجزة، بس المعجزات بتحتاج طاقة، وبرشلونة دلوقتي طاقته على الحافة.
