البورصة المصريه بتخسر 25 مليار جنيه وسط تراجع جماعي للمؤشرات
انهت البورصة المصريه جلسة النهارده الأربعاء 7 مايو 2025 على تراجع جماعي لكل المؤشرات، وسط ضغوط بيع كبيره من المستثمرين الاجانب، في الوقت اللي المصريين والعرب كانو بيشترو.
رأس المال السوقي فقد حوالي 25 مليار جنيه وده رقم مش بسيط، وبكده بيقفل عند 2.262 تريليون جنيه. أما قيمة التداول فوصلت لـ 6 مليار جنيه.
مؤشر إيجي إكس 30 اللي بيقيس أكبر 30 شركه في السوق، نزل بنسبة 1.38% وسجل 31840 نقطه وكمان مؤشر إيجي إكس 30 محدد الأوزان نزل بنسبة 1.23% وقفل على 39711 نقطه ومؤشر إيجي إكس 30 للعائد الكلي هبط هو كمان بنسبة 1.35% وسجل 14267 نقطه.
حتى مؤشرات الشركات الصغيره والمتوسطه ما سلمتش، لأن مؤشر إيجي إكس 70 متساوي الأوزان نزل بنسبة 0.87%، ومؤشر إيجي إكس 100 متساوي الأوزان هبط بنسبة 1.05%.
اللي بيحصل ده بيعكس حالة قلق واضحه في السوق، خصوصًا من المستثمرين الأجانب، وده ممكن يكون بسبب عوامل خارجيه أو تطورات داخليه في السياسه أو الاقتصاد وبس في نفس الوقت، دخول المصريين والعرب للشراء ممكن يفتح باب لارتداده إيجابيه قريب.
