هانز فليك يوجه رسالة دعم معنوي للاعبي برشلونة بعد الخروج الأوروبي
بعد الخروج المؤلم من دوري أبطال أوروبا في ميلانو، المدرب الألماني هانز فليك حرص على توجيه رسالة دعم معنوي للاعبي برشلونة داخل غرفة الملابس وفليك أكد للاعبين أنه فخور جدًا بأدائهم في المباراة، رغم الخروج، وقال لهم: “أنا فخور بكل واحد فيكم”. وأضاف إن الفريق صمد حتى آخر لحظة رغم التعب والإصابات والإحباط.
وفي المؤتمر الصحفي بعد المباراة، فليك كشف جزء من رسالته للاعبين، وقال: “لما توصلوا برشلونة عند الفجر، عايزكم تبصوا في المراية وتكونوا فخورين بكل اللي عملتوه” وكلامه ده كان فيه دعم كبير، خصوصًا بعد المجهود الكبير اللي بذله الفريق، اللي رغم الخسارة، أظهر روح كبيرة وعودة مرتين في النتيجة.
لكن هدف متأخر من إنتر ميلان في آخر المباراة حسم الأمور لصالحهم، لكن فليك أشار إن الهزائم دي جزء من التجارب اللي بتفيد الفريق، خصوصًا لما يكون عندك فريق شاب زي برشلونة اللي لسه بيكبر وقال: “هنرجع أقوى”.
رغم الهزيمة الصعبة في ملعب جوزيبي مياتزا، برشلونة أظهر إنه قادر يرجع للصفوف الأولى في أوروبا وفي النهاية، فليك ختم كلامه برسالة واضحة: “الموسم مستمر وطموح برشلونة لسه قائم”.
