تحكيم مباراة إنتر وبرشلونة: تساهل غريب واستهداف لامين جمال في إياب نصف النهائي
بعد الأداء الرائع للامين جمال في مباراة ذهاب نصف نهائي دوري أبطال أوروبا ضد إنتر، كان واضح من تصريح المدرب سيموني إنزاغي إنه متأثر بالموهبة الشابة دي، وصرّح إنه كان صعب عليهم يوقفوه حتى لو كانوا بيطبقوا الرقابة المزدوجة عليه ولكن لما جاء وقت الإياب، كان شكل إنتر مختلف تمامًا، وبدأوا يلعبوا بخطة “الإيقاف بالقوة”!
في أول 3 دقايق، الظهير ديماركو وجه ضربة قوية لجمال، أسقطته على الأرض، وكان في طلب من هانز فليك لبطاقة صفراء، بس حكم المباراة البولندي مارشيناك تجاهل الحكاية دي وكأن الدقيقه 3 بدري على إشهار الإنذار وده كان بداية التساهل الواضح مع لاعبي إنتر، والناس بدأت تتسائل: هل ده تحكيم عادل؟ ولا في حاجة مش ظاهرة في اللعبة دي؟
التدخلات العنيفة ما وقفتش هنا، في الدقيقة 34، ديماركو رجع كرر نفس الضربة من غير ما الحكم يتدخل وجمال على الرغم من ده كله، استمر في تقديم مستويات خرافية بمراوغاته، وتوغلاته، لدرجة إن كل محاولات إيقافه كانت بتبقى مستحيلة سواء بالأقدام أو الأيد.
وبما إننا بنتكلم عن استهداف واضح، لازم نقول إن جمال اتعرض لسبع مخالفات صريحة في 131 دقيقة من اللعب. ورغم كده، الحكم مارشيناك مابنش أي بطاقة على لاعبي إنتر إلا في الوقت الإضافي، لما نال أوغوستو بطاقة صفراء في الدقيقة 91، وبعدها باستوني في الدقيقة 117، بعد ما خلصت المباراة تقريبًا.
في الشوط التاني، المباراة كانت مليانة تدخلات عنيفة، زي ضربة باستوني في الدقيقة 58، أوغوستو اللي عرقل جمال في الدقيقة 62، وبعد كده في الدقيقة 67، كان فيه ركلة جزاء واضحة ضد جمال من مختاريان، بس الفار قرر نقلها بره المنطقة من غير ما الحكم حتى يراجع اللقطة.
المباريات دي مش دايمًا بتحسم بالأهداف بس، ساعات بتتحسم بخبث، وبالتفاصيل الدقيقة اللي مش كل الناس بتشوفها.
