ميدو يفجّر مفاجآت عن الزمالك وبيوجّه تحذير لمسؤول جوه النادي
كشف أحمد حسام ميدو، عضو لجنه التخطيط بنادي الزمالك، عن تفاصيل كتير جوه النادي، وقال إن سوء الحظ وكتر الإصابات ومشكلة زيزو كانت من أسباب التغيير اللي حصل وأضاف في مداخلته على قناة أون سبورت احنا احترمنا بيسيرو، وقرار التغيير اتاخد عشان مفيش توفيق، والمجلس كان لازم يتدخل
ميدو كمان بارك لأيمن الرمادي وقال إنه كان من ضمن الترشيحات، وإنه مدرب كويس وبيقدّم كورة هجومية، واللعيبة مرتاحة معاه. وأكد إن الرمادي مكمل لحد نهاية الموسم، وإن عنده شخصية قوية وتوازن نفسي.
وبالنسبه لزيزو، قال ميدو إنه راجع التمرين وبيحضر كل يوم، وإن مش من حق حد يقربله دلوقتي وكشف كمان إن في مسؤول جوه النادي بيحاول يوقع بين الناس، وقال لو اضطرينا هنكشف كل حاجه للجمهور
ميدو أشار كمان إن لجنة التخطيط بتشتغل بإيدها، وبتحاول تنقذ ما يمكن إنقاذه، وإنهم بيشتغلوا على تعيين مدير رياضي ومسؤول تعاقدات من أول يونيو وختم كلامه إن أزمة القيد هتتحل الأسبوع الجاي، والنادي بيدفع ١٢٠ مليون كل فتره انتقالات.
