أيمن الرمادي يجهز الزمالك بشكل هجومي جديد بعد رحيل بيسيرو
أعلن نادي الزمالك تعيين أيمن الرمادي مدير فني جديد للفريق الأول بدل من بيسيرو اللي مشي من يومين وده في محاولة لتعديل النتائج السلبية اللي كان الفريق بيعيشها في الدوري.
الرمادي ناوي يغير شكل الفريق تمامًا، وخصوصًا في الجانب الهجومي، وعايز يعتمد على خطة جديدة هجومية بعد فشل الطريقة الدفاعية اللي كان بيسيرو بيلعب بيها، اللي كانت 3 مدافعين ووسط كتير وهجوم ضعيف.
أيمن عنده فكر هجومي ظهر قبل كده مع سيراميكا وبيعتمد دايمًا على 4-1-4-1 أو 4-2-3-1 على حسب الماتش، وكان دايمًا بيدي حرية لبلحاج وقندوسي ومعاهم زلاكة وإسلام عيسى في الهجوم.
الرمادي ممكن يعتمد مع الزمالك على ناصر ماهر وعبد الله السعيد في صناعة اللعب ومعاهم محمد شحاتة أو أي لاعب وسط هجومي يساعدهم في الضغط والهجوم، وده كله عشان يغير شكل الزمالك اللي بقى باهت الفترة اللي فاتت.
الزمالك دلوقتي بيدور على الرجوع للمنافسة سواء في الدوري أو الكأس، خصوصًا إنه عنده ماتش مهم قدام بيراميدز في نهائي كأس مصر.
