ميدو يوضح تصريحاته ويهاجم صناع الفتنه داخل نادي الزمالك
أحمد حسام ميدو عضو لجنة التخطيط في الزمالك، خرج عن صمته ورد على الكلام اللي انتشر بخصوص تصريحاته الأخيره وأكد إنه مكنش يقصد الإساءة لأي حد من مجلس إدارة القلعة البيضاء، وإن في ناس حاولت تحرف كلامه علشان تولع الدنيا على الفاضي.
ميدو كتب على حسابه في منصة إكس أنا بحترم وبقدر كل أفراد مجلس الإدارة واللي قاله البعض عن تصريحاتي محرف وملهوش أي أساس إحنا كلنا في مركب واحدة هدفنا مصلحة الزمالك
وكان ميدو اتكلم في برنامج على قناة أون تايم سبورتس وقال إنه مش هو ولا حازم إمام بيسعوا للسيطرة على قطاع الكورة في النادي، بالعكس هما بيشتغلوا من قلبهم علشان الزمالك يرجع لمكانه الطبيعي.
كمان حذر ميدو من تصرفات شخص جوه النادي على حد وصفه بيحاول يشوه صورة لجنة التخطيط وقال إنه مش هيذكر اسمه احترامًا لتاريخه، بس لو اضطروا هيكشفوا كل حاجة قدام الجمهور.
وفي الآخر طلب ميدو من الكل يبعد عن الفتن والصيد في الميه العكره، لإن الزمالك محتاج تكاتف دلوقتي مش خلافات.
