فيكتور غيوكيرس يفضل أرسنال على مانشستر يونايتد رغم العروض المغرية
يبدو إن أرسنال دخل بقوة في سباق التعاقد مع المهاجم السويدي فيكتور غيوكيرس، واللي بحسب الصحفي جيسون بيرت من “تيليغراف”، بيُفضل الإنضمام للمدفعجية بدل مانشستر يونايتد لو قرر يسيب سبورتينغ لشبونة ويروح الدوري الإنجليزي في الصيف الجاي.
غيوكيرس لفت أنظار كتير من أندية أوروبا بعد موسم ناري مع لشبونة، وده خلى أرسنال يحطه على رأس أولوياته في الميركاتو الصيفي والنادي اللندني شايف إن الصفقة دي واقعية أكتر من محاولة ضم ألكسندر إيزاك نجم نيوكاسل، اللي سعره مبالغ فيه جدًا وبيصعب التفاوض عليه.
السويدي قدم أرقام خرافية مع فريقه، لعب 49 ماتش، سجل 52 هدف وقدم 12 أسيست! أرقام مش بس مبهرة، دي كمان بتأكد إنه مهاجم بيعرف يخلص وبيظهر وقت اللزوم.
أرتيتا عايز يعزز هجومه بلاعب يفرق، وغيوكيرس باين إنه ممكن يكون القطعة اللي ناقصة في تشكيلة أرسنال عشان يرجع ينافس بقوة محليًا وأوروبيًا.
هل الصفقة هتتم؟ ولا في مفاجآت تانية في الطريق؟ الأيام الجاية هتوضح.
