بايرن ميونخ قريب جدًا من خطف فيرتز وسط قلق مدريد والسيتي
واضح إن بايرن ميونخ ناوي يضرب ضربة كبيرة في السوق، والمرة دي الضحية هي مانشستر سيتي وريال مدريد، اللي كانوا بيطاردوا النجم الألماني الشاب فلوريان فيرتز، لكن التقارير الألمانية بتأكد إن بايرن خلاص داخل في آخر مراحل المفاوضات مع باير ليفركوزن.
ورغم إن ليفركوزن مش عايز يبيع نجم فريقه لنادي منافس في نفس الدوري، بس رغبة فيرتز الشخصية خلت الكفة تميل لصالح بايرن والولد نفسه عايز يروح ميونخ، وده خلا الإدارة في ليفركوزن تبدأ تعيد حساباتها.
والغريب بقى، إن بعض لاعيبة منتخب ألمانيا اللي موجودين في بايرن، بيقولوا إنهم شبه متأكدين إن فيرتز جاي الموسم الجاي! وده بيأكد إن فيه كلام داخلي قوي ومتفائل بخصوص الصفقة.
بس لسه قدام بايرن تحدي مش سهل القيمة المالية! ليفركوزن عايز أكتر من 120 مليون يورو، مبلغ ضخم، وبايرن بيحاول يقلل الرقم أو يضيف شروط تانية في العقد.
وبالرغم من إن كل المؤشرات بتقول إن الصفقة هتتم، بس لسه فيه شوية تفاصيل لازم تتحسم قبل الإعلان الرسمي. السيتي ومدريد أكيد لسه متابعين، بس حاليًا بايرن هو اللي في المقدمة.
