بايرن ميونخ يعضّ صباع الندم بعد ما فرّط في غرافينبيرش!
الندم بدأ يسيطر على إدارة بايرن ميونخ بعد ما شافوا اللي بيقدّمه لاعبهم السابق رايان غرافينبيرش مع ليفربول والصحفي الألماني الموثوق كريستيان فالك كشف إن في حسرة واضحة جوّه النادي البافاري على التفريط في النجم الهولندي الشاب.
إدارة بايرن كانت عارفة من البداية إن غرافينبيرش عنده إمكانيات فنية جبّارة، لكن للأسف ماقدروش يمنحوه الفرصة اللي يستحقها عشان يثبت نفسه والوقت كان قليل، والمشاركة محدودة، وده خلاه ما يقدرش يطلع كل اللي عنده.
لكن أول ما راح ليفربول، الوضع اتغير تمامًا واللاعب خد فرصته على طبق من ذهب، وبدأ يبرق ويثبت نفسه بسرعة في الدوري الإنجليزي الصعب. وده خلى إدارة بايرن تحس إنها خسرت جوهرة كان ممكن تكون مكسب كبير لو اتصبرت عليه شوية.
رايان شارك مع الريدز في 84 مباراة، سجل فيهم 4 أهداف، وصنع 6 تمريرات حاسمة وأرقام ممكن تكون مش خارقة، لكن بالنظر لسنه وأسلوبه، واضح جدًا إن اللاعب ماشي في طريق النجومية.
واضح إن بايرن مشكلته مش في الاختيارات، لكن في الصبر والفرص. غرافينبيرش كان مشروع نجم، بس اتساب يمشي من غير ما ياخد فرصته الكاملة.
