منسي يكرر مشهد سموحه وبيسجل هدف التقدم قدام سيراميكا
الزمالك قدر يخطف التقدم قدام سيراميكا كليوباترا ف الماتش اللي شغال بينهم دلوقتي على ملعب المقاولون العرب، ضمن منافسات الجوله الخامسه من مرحلة الحسم ف الدوري.
الهدف جه بدري، ف الدقيقة 14، لما استغل ناصر منسي مهاجم الزمالك غلطة قاتله من الحارس محمد بسام، اللي حاول يراوغ منسي قدام الجون، لكن ناصر خطف الكوره منه وسجلها بكل سهوله ف المرمى الفاضي.
الغريب إن الهدف ده مش أول مره منسي يعملها، نفس الطريقه تقريباً سجل بيها هدف ف شباك سموحه من كام اسبوع، لما حاول الهاني سليمان يراوغه، لكن النهايه كانت واحده جول للزمالك.
بكده ناصر منسي بيواصل تألقه اللافت الموسم ده، ورفع رصيده لـ11 هدف، متساوي مع إمام عاشور نجم الأهلي ف صدارة هدافي الدوري.
الزمالك بيأمل يحسم الماتش ويكسب الـ3 نقاط ف مشواره ف مرحله الحسم، خصوصًا إنه دخل اللقاء بمعنويات عاليه بعد فوز كبير ف الجوله اللي فاتت، وسيراميكا بيحاول يرجع ف النتيجه بعد الهدف المبكر اللي دخل مرماه.
