محمود سعد يوجه نداء مؤثر لإنهاء أزمة محمود عبد العزيز
علق الإعلامي محمود سعد على الخلاف اللي داير الأيام دي بين ولاد الفنان الكبير الراحل محمود عبد العزيز والإعلامية بوسي شلبي.
ونشر محمود سعد على صفحته على فيسبوك صورة لمحمود عبد العزيز وكتب رساله لمحمد وكريم قالهم فيها: “مش بحب أدخل في خصوصياتكم، بس لما الموضوع وصل للمحاكم والسوشيال ميديا وبقى فيه كلام عن زواج وطلاق، فده بيمس اسم غالي زي محمود عبد العزيز، فحرام”.
كمل محمود سعد كلامه وقال: “يا ريت توقفوا كل ده وتقعدوا سوا كلكم، وتحلوا المشكله بهدوء بعيد عن القيل والقال. ده مش تدخل مني، لكن من محبتي ليكم ولمحمود”.
الجدير بالذكر إن الأزمة بدأت بعد ما طلع كريم ومحمد، ولاد الفنان، وأعلنوا إن بوسي شلبي كانت مطلقه من أبوهم من سنة 1998، وإنها مش مراته وقت وفاته، وإن علاقتها بيه بعد الطلاق كانت إداريه بس.
وردت بوسي شلبي وقالت إنها كانت على ذمته لحد آخر لحظه، وإن في ناس زورت أوراق علشان ياخدوا أرض، وإن ده بيتم التحقيق فيه دلوقتي، وإن الشائعات دي أذت سمعتها وسمعة الراحل.
وما زالت القضيه شغاله، وسط تفاعل كبير من الجمهور اللي بيحب محمود عبد العزيز وبيتمنى يتقفل الملف ده بكرامه.
