رغم التأهل شباب مصر ف المركز التالت بسبب الهزيمه التقيله
تأهل منتخب مصر للشباب رسميًا لربع نهائي بطولة أمم أفريقيا تحت 20 سنه، بعد الفوز على تنزانيا بهدف وحيد، ف ختام دور المجموعات، لكن الغريب إن الفراعنه ورغم التساوي ف النقاط مع جنوب أفريقيا وسيراليون، إلا إنهم جُم ف المركز التالت.
مصر كده صعدت كأفضل تالت، مع الكونغو، وده بعد خصم نتائج ماتشات المنتخبات قدام تنزانيا، باعتبارها أضعف فريق ف المجموعه.
السبب ف تراجع مركز مصر رغم الفوز، بيرجع للوائح البطوله، اللي بتفصل بين المنتخبات المتساويه ف النقط حسب المواجهات المباشره، مش فارق الأهداف العام.
مصر كسبت جنوب أفريقيا 1-0، وجنوب أفريقيا كسبت سيراليون 4-1، وسيراليون كسبت مصر برضو 4-1 فبكده فارق الأهداف بين التلاته خلّى جنوب أفريقيا أول، وسيراليون تاني، ومصر تالت.
يعني الهزيمه الكبيره من سيراليون كانت السبب ف تراجع ترتيب شباب مصر، رغم إنهم كسبوا جنوب أفريقيا.
المنتخب هيقابل غانا يوم الاتنين الجاي، الساعه 6 مساءً، على ستاد السويس، وده ربع النهائي، والفوز فيه معناه تأهل مباشر لكأس العالم ف تشيلي.
