إضراب ميديابرو يهدد الليغا بالتعتيم التلفزيوني في آخر 3 جولات
الدوري الإسباني ممكن يواجه أزمة كبيرة في آخر 3 جولات، بعد تهديد موظفي شركة “ميديابرو” – المسؤولة عن إنتاج مباريات الليغا – بالإضراب والإضراب ده لو حصل فعلًا، هيكون فيه “تعتيم تلفزيوني” غير مسبوق على الملاعب، والجماهير مش هتقدر تشوف الماتشات على الشاشة.
رابطة الليغا طلعت بيان بتحاول فيه تهدي الناس، وقالت إنها بتتعامل مع الوضع بهدوء، وإنه لسه فيه خطط بديلة عشان التغطية تستمر بشكل طبيعي. بس لحد دلوقتي، مافيش تأكيد رسمي إذا كانت الأزمة دي هتتحل ولا لأ.
الأزمة مش بس بتأثر على الجماهير، لأ كمان عندها تبعات اقتصادية ضخمة، خصوصًا على الأندية اللي معتمدة على حقوق البث كمصدر دخل أساسي ومثلًا برشلونة، بيعتمد على البث التلفزيوني في 16٪ من دخله! فلو البث توقف، النادي ممكن يواجه خسائر مالية كبيرة جدًا، وده يأثر على ميزانيته وتحقيقه للأهداف الاقتصادية اللي محددها الموسم ده.
الكل دلوقتي منتظر يشوف هل هتنجح الرابطة في حل الموضوع قبل فوات الأوان، ولا فعلاً هنشوف جولات حاسمة في الليغا من غير تغطية ولا جمهور على الشاشة؟
