أردا غولر بيحلم بالمجد في ريال مدريد مع تشابي ألونسو
اللاعب التركي الشاب أردا غولر عايش حالة من التفاؤل اليومين دول، بعد الأخبار اللي بتقول إن كارلو أنشيلوتي قرب يمشي، وتشابي ألونسو هيبقى المدرب الجديد لريال مدريد بداية من الموسم الجاي.
غولر اللي خطف الأنظار مؤخرًا بهدف رائع قدّمه ضد سيلتا فيغو، حاسس إن فرصته جاية وبقوة، خصوصًا مع وجود مدرب زي ألونسو، اللي أصلاً بيحبه وبيعجب بأسلوبه في اللعب، بحسب كلام الصحفي فابريزيو رومانو.
الواد أثبت نفسه وبقوة من ساعة ما جه الريال، شارك في 51 ماتش، لعب فيهم حوالي 1913 دقيقة، وسجل 11 جول وصنع 9 أهداف لزمايله وأرقام مش قليلة بالنسبة لحد عمره صغير ولسه بيتأقلم مع فريق بحجم الملكي.
تشابي ألونسو معروف إنه بيحب يدي فرص للعيبة الصغار اللي عندهم موهبة، وده بالظبط اللي غولر بيمثله، عشان كده الكل مستني يشوف تأثيره في مشروع الريال الجديد.
الجماهير بدأت تحلم إنها تشوف أردا أساسي، مش بس لأن مستواه عالي، لكن كمان عشان هو لاعب عنده طموح ومش بيخاف من التحديات الكبيرة.
