لامين جمال عقدة ريال مدريد والموهبة الكتالونية تواصل إشعال الكلاسيكو
من يوم ظهوره الأول مع برشلونة، والكل بيقول إن لامين جمال مش لاعب عادي.. الولد ده مختلف فعلًا. في 29 أبريل 2023، وهو لسه ما كملش 15 سنة، نزل سبع دقايق بس ضد ريال بيتيس، لكن السبع دقايق دول كانوا بداية لحكاية كبيرة بدأت تتكتب بسرعة الصاروخ.
في سنتين بس، لامين بقى بطل في بطولات كبار زي أمم أوروبا، وكأس السوبر الإسباني، وكأس ملك إسبانيا، ولسه ما قالش كلمته الأخيرة ودلوقتي، الولد الموهوب ده قريب يحقق الدوري الإسباني للمرة التانية، وبرشلونة بيسير بخطى ثابتة قدام ريال مدريد.
بس اللي فعلاً بيخلّي لامين حديث الجمهور، هو تأثيره القوي في مباريات الكلاسيكو. كل ما ييجي قدام ريال مدريد، بيبقى في حماس ونار وفي أول كلاسيكو ليه الموسم ده، أحرج جمهور سانتياغو برنابيو وسجل هدف عالمي، والماتش انتهى 4-0 لبرشلونة.
وفي نهائي السوبر الإسباني؟ ولا كأن عنده 16 سنة! سجل هدف التعادل وصنع هدف الفوز، وكأن عنده خبرة سنين. وفي نهائي كأس الملك، صنع هدفين خلوا برشلونة يرفع الكأس، وأثبت إنه مش بس موهبة، لكن كمان عنده شخصية لاعب كبير.
دلوقتي، لامين بيستعد للكلاسيكو الرابع ليه الموسم ده، اللي هيكون بكرة الأحد، وعينه على مزيد من الإبداع والتألق واللاعب مركز جدًا وبيحاول دايمًا يرضي جماهير البلوغرانا اللي بقت شايفاه رمز المستقبل.
الجمهور الكتالوني شايف إن لامين مش بس نجم صاعد، ده مشروع أسطورة حقيقية في طريقها للسطوع في سماء برشلونة والعالم كله.
