فليك قبل الكلاسيكو: برشلونة جاهز لريال مدريد رغم خيبة الأبطال
قبل موقعة الكلاسيكو اللي الكل مستنيها، طلع مدرب برشلونة هانز فليك يتكلم عن حالة فريقه بعد الإقصاء المؤلم من دوري أبطال أوروبا قدّام إنتر ميلان، وقال كلام يطمن الجماهير شوية.
فليك قال بصراحة: “إحنا بخير، والكل عارف إن الهزيمة في ميلانو كانت صعبة علينا، لكن الفريق استوعب اللي حصل، وتكلمنا عن اللي لازم نعمله في الأسبوعين الجايين.”
المدرب الألماني شدد على إن مباراة الكلاسيكو اللي هتتلعب بكرة ضد ريال مدريد مهمة جدًا لبرشلونة، وبتعتبر اختبار حقيقي لقدرة الفريق على استعادة توازنه قدّام الغريم التقليدي.
وأضاف فليك: “لسه قدامنا أربع مباريات في الليغا، بس الكلاسيكو ليه طعم خاص، وعايزين نثبت إننا نقدر نرجع ونقدّم كورة حلوة واللعيبة جاهزين نفسيًا وبدنيًا، وواثقين في نفسهم.”
وختم كلامه بجملة جمهور برشلونة حبها: “لو سألت أي لاعب عندي، الكلاسيكو هو ماتش لازم نفوز بيه وهندخل نكافح ونقدم كل اللي عندنا ونلعب على التلات نقاط.”
الكلاسيكو دايمًا له أجواءه الخاصة، وبرشلونة تحت قيادة فليك عايز يرد على الخروج الأوروبي بطريقة تليق بتاريخ النادي ونشوف إذا كانت ردة الفعل هتكون بحجم الحدث.
