فليك عينه على الكلاسيكو لحسم الليغا وإنهاء الشكوك تمامًا
هانز فليك، مدرب برشلونة، داخل مباراة الكلاسيكو الجاية ضد ريال مدريد وهو حاطط عينه على هدف واحد: حسم لقب الليغا نهائيًا.
المواجهة المرتقبة هتتلعب يوم الأحد في ملعب مونتجويك، وفوز البرسا فيها أو حتى تعادل، ممكن يقرب الفريق جدًا من التتويج قبل 3 جولات بس من النهاية.
لكن الهزيمة؟ هتفتح باب كبير للتساؤلات، لأن وقتها هيقل الفارق بين الفريقين لنقطة واحدة، وده موقف أكيد ما يتمناهوش لا فليك ولا جمهور الكامب نو.
المدرب الألماني حاول خلال الأيام اللي فاتت يرفع معنويات فريقه بعد الخسارة من إنتر في دوري الأبطال، ونظم شوية فعاليات داخل النادي عشان اللاعبين ينسوا الإحباط ويركزوا على الليغا وكمان بدأ في تجهيز شوية مفاجآت للتشكيلة، أهمهم 3 أسماء بارزين:
- روبرت ليفاندوفسكي: رغم مستواه الضعيف قدام إنتر، لكن فليك بيفكر يرجّعه أساسي قدام ريال مدريد، بدل فيران توريس. ليفا ناوي ينافس مبابي على لقب الهداف، ودي فرصة كبيرة قدامه.
- أليخاندرو بالدي: رجع من الإصابة وبيقدّم مستويات كويسة جدًا في التدريبات. غالبًا هنشوفه في التشكيلة الأساسية، بس القرار لسه مش نهائي.
- مارك كاسادو: مش مرشح يبدأ أساسي، لكن فليك استدعاه للمباراة كمكافأة ليه بعد ما اتعافى من إصابة طويلة في ركبته.
والخبر الحلو كمان، إن تير شتيغن راجع للقائمة بعد غيابه عن دوري الأبطال. أما الغايبين فهم كوندي ومارك برنال بسبب الإصابة.
التشكيلة المتوقعة لفليك قد تكون كالتالي:
في الحراسة تشيزني، والدفاع فيه إريك، كوباوسي، إينيغو، وبالدي.
الوسط فيه فرانكي، بيدري، وأولمو. والهجوم هيقوده لامين يامال، ليفاندوفسكي، ورافينيا.
المباراة دي ممكن تكون بوابة لتتويج البرسا بثلاثية محلية لأول مرة من زمان، بعد ما حصدوا السوبر وكأس الملك وفليك داخل بكل قوته، وعايز يقفل الموسم بأقوى صورة ممكنة.
