أراوخو بين نار الرحيل والبقاء وشرط جزائي يخلّي مستقبله غامض
رغم إنه مدّد عقده مع برشلونة لحد 2031، إلا إن مستقبل رونالد أراوخو المدافع الأوروجوياني لسه مش واضح، والقلق حوالين استمراره مع الفريق بقى حديث الكل في الكامب نو، خصوصًا بعد التفاصيل الغريبة اللي ظهرت في عقده الجديد.
الصحف الإسبانية، وبالأخص “ماركا”، كشفت إن العقد فيه بند غريب جدًا: الشرط الجزائي اللي كان مليار يورو، نزل فجأة لـ 70 مليون يورو بس، وده كمان لمدة 10 أيام بس في شهر يوليو الجاي.
تخفيض ضخم جدًا، واللي يخلي الباب مفتوح على مصراعيه لأي نادي ييجي ويخطفه بسهولة لو قرر يمشي.
اللي بيزود الشكوك حوالين بقاء أراوخو هو تراجع مستواه الفترة اللي فاتت، وكمان خروجه أحيانًا من التشكيلة الأساسية. فوق ده كله، برشلونة بدأ يتحرك للتعاقد مع مدافع تاني، وهو جوناثان تاه من باير ليفركوزن، اللي ممكن ييجي مجانًا لو الصفقة خلصت.
تاه قال إنه جاهز ييجي برشلونة، بس منتظر النادي يحسم قراره بسرعة، خصوصًا إنه عليه طلب من أندية تانية كبيرة زي بايرن ميونخ.
وفي ظل الأزمة المالية اللي بيعاني منها النادي، والاعتماد على بيع مقاعد الـVIP عشان يوفروا سيولة، بيع أراوخو ممكن يكون واحد من الحلول السريعة لتخفيف الأعباء، خصوصًا إنه مبقاش ركيزة أساسية في الفريق.
رغم إن أراوخو طلع وقال بعد التوقيع إنه ناوي يكمل، بس الكواليس شكلها عكس كده وحاليًا، الكل منتظر نهاية الموسم عشان يتحدد مصيره، لكن الواضح إن أول 10 أيام في يوليو هتكون مفصلية، وهتبين إذا كان أراوخو هيكمل في برشلونة ولا هيشد الرحال لمكان تاني.
