كلاسيكو ممكن يكون الٱخير لفاسكيز ومودريتش مع ريال مدريد
الناس كلها مستنية الكلاسيكو الجاي بين ريال مدريد وبرشلونة، بس المرة دي الماتش ليه طابع مختلف شوية، خصوصًا للثنائي مودريتش وفاسكيز، اللي ممكن يكون ده ٱخر كلاسيكو ليهم بقميص الريال.
الكلام كتر اليومين دول عن احتمالية رحيل لاعبين كتير مع نهاية الموسم، بس في مدريد الموضوع واضح أكتر، فرص فاسكيز ومودريتش في الاستمرار بقت ضعيفة جدًا.
فاسكيز، اللي طلع من ناشئين النادي وحقق 23 لقب مع الفريق الأول، شكله خلاص قرّب يودع، مافيش أي مفاوضات لتجديد عقده، وكمان النادي جاب ترينت ألكسندر-أرنولد، وده معناه إن فرصه في اللعب الموسم الجاي شبه منعدمة، خصوصًا مع وجود كارفاخال الجاهز تمامًا.
ورغم كده، الراجل مركز على إنه يقدّم كل اللي يقدر عليه في بطولة كأس العالم للأندية، وممكن يكون ده الكلاسيكو رقم 21 ليه.
أما مودريتش، فالوضع مختلف شوية. النجم الكرواتي لسه عنده أمل إنه يفضل مع الفريق موسم كمان وشايف إنه قدم أداء كويس السنة دي، ومتقبل دوره كبديل، وده حاجة النادي بيحترمها جدًا.
مودريتش نفسه يكمل عشان يلعب في كأس العالم 2026، وسنه قرب على الأربعين، بس لياقته وأداءه بيخلوه لسه منافس قوي ولو شارك في الكلاسيكو، هيكون ظهوره رقم 38 في القمة دي، وده رقم كبير جدًا.
الكلاسيكو الجاي مش بس ماتش كبير في الدوري، ده ممكن يبقى لحظة وداع لأسطورتين من ريال مدريد، لكن كمان فرصة أخيرة ليهم يثبتوا إنهم لسه قدها.
