محمد سيحا في الأهلي خمس سنين بعد اتفاق نهائي مع المقاولون
النادي الأهلي خلص كل حاجه تقريبا علشان يضم محمد سيحا، حارس مرمى المقاولون العرب، بشكل رسمي في الانتقالات الصيفية الجاية، وده بعد ما حصل اتفاق كامل مع اللاعب وناديه، واللي بيظهر حاليًا مع حرس الحدود على سبيل الإعارة.
مصدر قريب من اللاعب أكد إن سيحا مضى بالفعل على عقود انتقاله للأهلي، وده بعد جلسه جمعته هو ووكيله أحمد يحيى، مع محمد يوسف المدير الرياضي للأهلي، ومحمد رمضان من لجنة التخطيط وتم فيها توقيع العقود لمدة 5 مواسم قدام.
الاتفاق شمل كمان كل تفاصيل الصفقة بين الأهلي والمقاولون، واستلم محمد يوسف استغناء اللاعب بشكل رسمي من ذئاب الجبل، ومتبقاش غير الإعلان الرسمي من النادي الأحمر علشان يتم تقديم سيحا كلاعب جديد في الفريق.
محمد سيحا عنده 24 سنه، وشارك الموسم ده في 14 ماتش مع حرس الحدود، واستقبل 19 جول، وقدر يحافظ على شباكه نظيفة في 7 مباريات، وده خلاه تحت أنظار الأهلي اللي قرر يدعّم بيه مركز حراسة المرمى الفترة الجاية.
