أنشيلوتي يفاجئ الكل ويضم فيكتور مونيوز لقائمة الكلاسيكو
في خطوة مفاجئة ومثيرة، قرر كارلو أنشيلوتي مدرب ريال مدريد إنه يضم المهاجم الشاب فيكتور مونيوز لقائمة الفريق اللي هتواجه برشلونة في الكلاسيكو الجاي والقرار ده فاجئ الكل، خاصة وإن مونيوز لسه بيلعب مع فريق كاستيا، لكن واضح إن الولد لفت الأنظار بقوة.
مونيوز يعتبر واحد من أبرز اكتشافات كاستيا الموسم ده، وبيقدم أرقام ممتازة، سجل 10 أهداف وصنع 7 كمان، يعني الولد مش بس هداف، لأ كمان بيخلق فرص ويشارك في اللعب والأرقام دي خلت عيون أنشيلوتي تروح عليه، خاصة مع ضغط المباريات وإصابات بعض اللعيبة.
اللي زاد الموضوع حماس، إن النادي أعلن إن مونيوز تفوّق في السرعة على لاعيبة كبار زي فينيسيوس جونيور! وده مش قليل، لأننا عارفين فينيسيوس بيطير حرفيًا في الملعب، فلو مونيوز سبقوا في السرعة، يبقى قدامه مستقبل كبير فعلًا.
جمهور ريال مدريد متحمس يشوف الولد ده في الملعب، ولو خد شوية دقائق قدام برشلونة أو حتى بعد كده في باقي المباريات، ممكن يبقى من المفاجآت السارة اللي تطلع من الأكاديمية وتثبت نفسها مع الكبار.
