آرسنال يخطف زوبيمندي من سوسيداد وسط تجاهل من ريال مدريد
أول صفقات آرسنال الصيف ده وصلت خلاص، والنادي اللندني قدر يخطف لاعب الوسط الإسباني مارتين زوبيمندي من ريال سوسيداد، بعد مفاوضات استمرت كام أسبوع والجانرز حسموا الصفقة بسرعة وذكاء، وبيبعتوا رسالة واضحه لباقي الأندية إنهم داخلين بقوة في سوق الانتقالات.
اللاعب كان عليه كلام من ريال مدريد حسب ما ذكرته شبكة “ريليفو” الإسبانية، بس الميرينغي ماعملش أي خطوة جدية لضمه، واكتفى بمتابعته من بعيد ومدريد واضح إنه مش شايف زوبيمندي أولوية دلوقتي، خصوصًا إنه في مركز الارتكاز معتمد على تريو تشواميني، كامافينغا، وفالفيردي.
النادي الأبيض لو حب يجيب لاعب وسط، فالأقرب إنه يدور على حد يكون عنده لمسة هجومية أكتر أو صانع لعب بإبداع أعلى، وده ممكن يفسر ليه تجاهلوا زوبيمندي رغم موهبته.
أما آرسنال، فشايفين إن اللاعب هيكون إضافة قوية وسط الميدان، خصوصًا مع تطلعات أرتيتا إنه ينافس على كل البطولات الموسم الجاي.
زوبيمندي دلوقتي قدامه فرصة جديدة في البريميرليغ، وملايين من جماهير آرسنال مستنية تشوف تأثيره في خط النص.
