إريك غارسيا قدام أصعب اختبار ضد فينيسيوس في كلاسيكو ناري
بعد موجة الإصابات اللي ضربت دفاع برشلونة الموسم ده، بقى إريك غارسيا هو الحل الوحيد لتعويض غياب جول كوندي، وده بيحط عليه ضغط كبير قبل كلاسيكو مصيري ضد ريال مدريد.
غارسيا كان نجم قدام إنترميلان، وقدم مباراة قوية، لكن المرة دي التحدي أصعب بكتير وهو دلوقتي في مواجهة مباشرة مع فينيسيوس جونيور، اللاعب اللي معروف بسرعته الخرافية ومهاراته واحد على واحد ولو الأمور مشت زي ما بيتوقع البعض، ممكن نشوف مبابي كمان متمركز في الجهة دي، وساعتها هتكون المهمة شبه مستحيلة!
برشلونة لازم يكون عنده خطة دفاعية ذكية، تغلق المساحات وتقلل خطورة الهجمات المرتدة، لإن ريال مدريد بيعرف يضرب في اللحظة المناسبة وغارسيا مش بس هيكون مطالب بالتركيز الكامل، لكن كمان بالهدوء وعدم الوقوع في الأخطاء الساذجة.
دي المباراة اللي يا إما تطلع فيها نجم كبير، يا إما تنهار تحت الضغط. وكل العيون دلوقتي على غارسيا، نشوف هيكون قد التحدي ولا لأ.
