نجوم المراوغات فالدوري السعودي ماوليدا يتصدر وساهموا فصنع الفارق
لو اتفرجت على الدوري السعودي الموسم ده، أكيد لاحظت كمية المهارات العالية والمراوغات اللي بتخلي الجمهور يقوم من على الكرسي من الحماس! الموسم الحالي شهد بروز لاعبين كتير عندهم قدرة رهيبة على المراوغة وكسر خطوط الدفاع.
وطبقا للإحصائيات، فيه 13 لاعب قدروا يعملوا أكتر من 50 مراوغة ناجحة، وده رقم كبير بيدل على الشغل الفردي الكبير اللي بيقدمه اللعيبة دول.
اللاعب اللي كسر الدنيا حرفيًا هو ماوليدا من فريق الخلود بـ91 مراوغة ناجحة! أرقامه خرافية، وبيفكرنا باللعيبة الكبار اللي كل كورة معاهم بتحمل خطر ووراه على طول ساكالا من الفيحاء بـ76 مراوغة، وفورتونيس من الخليج بـ71.
برضو نكودو وباسوجوج متساويين بـ69 مراوغة، وده بيأكد إن ضمك والأخدود عندهم حلول فردية خطيرة ومن اللافت كمان تواجد همام الهمامي وأليكس كولادو من الخلود، وده يثبت إن الفريق ده مش بس بيعتمد على اللعب الجماعي، لكن عنده مهارات فردية جبارة.
وما ننساش أسماء معروفة زي سالم الدوسري من الهلال، اللي دايمًا بيبهر الجمهور بتحركاته، ومعاه جواو كانسيلو اللي بيثبت إنه مش بس مدافع، لكن كمان مهاري وذكي جدًا في التقدم بالكرة.
المراوغات مش بس منظر، دي سلاح فتاك بيغير مجرى المباريات. واللعيبة دي أثبتوا إنهم قادرين على خلق الفارق فرديًا، وبيخلوا الدوري السعودي أكتر حماس وإثارة كل موسم.
