فران غارسيا قدّامه فرصة العمر ضد لامين جمال في الكلاسيكو
صحيفة ماركا الإسبانية كشفت إن مستقبل الظهير الأيسر فران غارسيا مع ريال مدريد ممكن يتحدد بشكل كبير من خلال أداءه في الكلاسيكو النهاردة قدّام برشلونة، وخصوصًا في المواجهة المباشرة اللي هتجمعه بالنجم الصاعد لامين جمال.
المباراة هتتلعب على ملعب مونتجويك، ودي فرصة نادرة لفران عشان يثبت نفسه، خصوصًا إنه هيبدأ أساسي بعد غياب البدائل في مركزه.
الموقف مختلف تمامًا عن نهائي السوبر، وقتها نزل بديل بشكل مفاجئ بعد إصابة ميندي، ومع كده قدر يقدّم مستوى كويس ويوقف خطورة لامين بدرجة كبيرة.
النهاردة الوضع مختلف، لأن فران غارسيا كان عنده وقت كفاية يستعد ويحلل طريقة لعب لامين والجهاز الفني لاحظ إن لامين بيحب يستلم الكورة على رجله أكتر من إنه يجري في المساحات، وده ممكن يساعد فران يضغط عليه من أول لمسة ويقلل خطورته.
فران لعب 75 مباراة مع الريال من ساعة ما رجع في صيف 2023، لكن لحد دلوقتي ماكسبش ثقة أنشيلوتي بشكل كامل، حتى مع مشاركته في 43 مباراة الموسم ده، فضّل المدرب يخلّيه احتياطي في معظم الوقت.
لكن الكلاسيكو ده ممكن يغيّر كل حاجة، خصوصًا مع قرب وصول تشابي ألونسو لتدريب الفريق الموسم الجاي، وألونسو أصلًا يعرف فران كويس من أيام ما كان في باير ليفركوزن وحاول يضمه وقتها.
بالتالي، مواجهة النهاردة ممكن تكون نقطة تحوّل يا إما يثبت نفسه ويكمل مع الملكي، يا إما تكون بداية الوداع من الباب الخلفي.
