رافينيا بعد الكلاسيكو: كان ممكن نكسب بسهولة أكتر من كده
بعد فوز برشلونة على ريال مدريد 4-3 في كلاسيكو مجنون ضمن الجولة 35 من الدوري الإسباني، خرج البرازيلي رافينيا دياز بتصريحات فيها ثقة وواقعية في نفس الوقت والراجل كان واضح جدًا وقال إن الفريق لعب على الفوز، وده هدفهم من أول الموسم، سواء في مباريات كبيرة أو صغيرة.
رافينيا قال: “إحنا هنا عشان نكسب، وده اللي عملناه طول الموسم. في ماتشات مهمة وماتشات ممكن ناس تشوفها عادية، بس إحنا بنلعب بكل تركيز.”
وأكد إن الكلاسيكو كان له أهمية خاصة عندهم، وكانوا عارفين إن لو دخل فيهم جول، لازم يفضلوا هاديين ويرجعوا في النتيجة، وده فعلًا اللي حصل.
اللاعب كمان أتكلم عن أسلوب اللعب، وقال إن طريقة برشلونة وطريقة ريال مدريد بيخلقوا فرص كتير للتسجيل، خصوصًا مع لعيبة عندهم جودة عالية في الملعب، لكن اللي يفرق في الآخر هو الدفاع وقت اللزوم والخروج بالثلاث نقاط.
وبالرغم من الفوز، رافينيا حس إن الماتش كان ممكن يكون أسهل، وقال: “أضعنا فرص كتير، ولو كنا سجلناها، كانت هتبقى النتيجة أريح بكتير وجول ريال مدريد التالت رجعهم شوية في الماتش، بس إحنا دافعنا كويس، وده المهم.”
ببساطة، برشلونة عرف يكسب، ورافينيا بيأكد إن الفريق على الطريق الصح، لكن لسه عندهم سقف أعلى يقدروا يوصلوا له لو استغلوا الفرص أكتر.
