طارق العريان يكشف كواليس فيلم “السلم والثعبان” وأسباب غياب منة شلبي
المخرج طارق العريان فاجئ الجمهور في لقاءه مع برنامج “بصراحة” وقال إن تصوير الجزء التاني من فيلم “السلم والثعبان” ابتدى خلاص، بس أوضح إن الفيلم مش تكمله للقصه القديمه، إنما بيدور عن الحب والزواج بعد عشر سنين، وبشخصيات جديدة خالص.
وأكد إن ظافر العابدين ليه دور كبير في الفيلم ومش مجرد ضيف شرف زي ما الناس كانت فاكره، وإن منة شلبي اعتذرت عن البطولة بسبب ظروف خاصة، وعشان كده اختار أسماء جلال عشان تقوم بالدور.
وقال كمان إن الفيلم هيكون رومانسي اجتماعي، وفيه نضج أكتر من الجزء الأول لإن الشخصيات كبرت واتغيرت. أما عن زوجته نيكول سعفان، فقال إنها هتشارك في الفيلم بشكل مفاجئ، وإن أجرها “غالي جداً” على حد تعبيره.
ومن ناحيتها، نيكول عبّرت عن حماسها للفيلم وقالت إنها قرت السيناريو ومقتنعه إنه هيعجب الناس، ووصفت الفيلم بالأيقوني.
وبالنسبة لفيلم “لعب عيال” اللي كان اسم متداول، طلع هو نفسه الجزء التاني من “السلم والثعبان”، وكان مرشحته منى زكي في البداية.
وفي الآخر، كشفوا كمان إن فيه جزء رابع من “ولاد رزق” في التحضير، وفيه مفاجآت كتير جاية.
