لامين جمال يبدع في الكلاسيكو ويدّب الرعب في قلوب مدريد
لامين جمال الولد ده بقى بيعمل حاجات كبار، بجد! في كلاسيكو ناري بين برشلونة وريال مدريد، الشاب اللي لسه مكملش 18 سنة خلّى كل العيون عليه، والناس كلها بتتكلم عنه دلوقتي، بعد ما لعب ماتش للتاريخ، وخلّى دفاع الريال يتشل حرفيًا! 😱
الماتش انتهى 4-3 لبرشلونة، بس اللي خطف الأضواء كلها هو لامين. الصحافة الكتالونية وبالذات موندو ديبورتيفو قالتها بصراحة: “الولد ده مش طبيعي” ومن أول دقيقة وهو شغال ضغط ومراوغات وتسديدات كأن عنده 10 سنين خبره في الليغا.
تعالوا نشوف شوية أرقام من اللي عملها في الماتش:
- أكتر واحد في البرسا سدد (7 مرات).
- سدد على الجون 5 مرات.. رقم كبير لحد سنه.
- خلق 3 فرص محققه.. وكان متساوي فيها مع رافينيا وبيدري وفيران.
- عمل 4 مراوغات ناجحة، خلّى الدفاعات تلف حوالين نفسها.
- استرجع الكورة 7 مرات.. يعني مش بس هجومي، كمان بيرجع يدافع!
غير كده، عمل 65 تمريرة، منهم 31 تمريرة متقنة في الثلث الأخير من الملعب وده بيقول قد إيه هو شجاع وما بيخافش يباصي في أماكن صعبة.
الماتش خلص، بس الكلام عن لامين لسه ما خلصش والصحفيين والمحللين بيقولوا إن أداءه قدّام ريال مدريد بيأكد إنه مش بس موهبة جاية، ده خلاص دخل دايرة نجوم العالم ولسه اللي جاي أحلى. 🤩
إحنا بصراحة، لو فضل لامين على المستوى ده، برشلونة ضمن فريق مرعب في السنين الجاية واللي شاف الماتش يعرف إن الكلاسيكو ده كان بداية عهد جديد لواحد اسمه “لامين جمال”.
