دي بروين بيدرس عرض نابولي ومكالمات مع لوكاكو وميرتنز خلته متحمس
التقارير الإعلاميه بتأكد إن البلچيكي كيفن دي بروين، نجم مانشستر سيتي، وافق بشكل مبدأي على فكره الانتقال لنابولي الإيطالي بعد ما السيتي أعلن رحيله نهاية الموسم ده، بعد 10 سنين مع الفريق.
نابولي مش الوحيد اللي عايز يتعاقد مع دي بروين، في أندية تانيه من أوروبا والسعوديه وأمريكا، بس العرض الإيطالي شدّ اللاعب خصوصاً بعد المكالمات اللي حصلت بينه وبين لوكاكو صديقه ومهاجم نابولي حاليًا، وكمان دريس ميرتنز نجم نابولي السابق، وده خلى اللاعب متحمس يعيش في إيطاليا مع أسرته.
حسب سكاي سبورتس السويسريه، دي بروين أدّى الضوء الأخضر لوكلاه علشان يكملوا التفاوض مع نابولي، واللاعب شايف إنه لسه قادر يلعب على مستوى عالي في أوروبا.
عرض نابولي حالياً بيشمل عقد سنتين مع إمكانية التمديد لسنه كمان، لكن الوكاله بتطلب عقد مضمون 3 سنين. وبالنسبه للراتب، النادي الإيطالي عرض 7 مليون يورو بالسنه، غير مكافأة التوقيع اللي لسه هيتفقوا عليها.
هل نشوف دي بروين فـ الدوري الإيطالي الموسم الجاي؟ ده اللي هنشوفه قريب
