تشيزني محتار بين برشلونة وعيلته والقرار لسه ما اتحسمش
بعد فوز برشلونة المثير على ريال مدريد 4-3، طلع الحارس البولندي فويتشيك تشيزني بتصريح قلب الدنيا، وقال إنه وصله عرض من إدارة برشلونة لتجديد عقده لحد يونيو 2027.
بس الواضح إن الموضوع مش سهل عنده، لأنه لسه ماخدش القرار، وقال بصراحه: “أنا مدين لعيلتي، خصوصًا مراتي، والقرار لازم نختاره سوا.”
تشيزني كمل كلامه بطريقة بسيطة، وقال إن مراته غالبًا هي اللي بتاخد القرارات في البيت، وهو مش مكسوف من كده “قرارات الكورة عادةً بتكون قراري، بس الموقف ده مختلف، كنا ناويين نعيش سنة هنا ونرجع نلعب غولف ونرتاح!”
الراجل صريح جدًا، ومش مدّي الموضوع طابع درامي، بالعكس، باين عليه مستمتع باللي بيحصل حواليه، خصوصًا بعد الكلاسيكو اللي فاز فيه برشلونة، وقال إنه بيستمتع باللحظة ومش بيفكر كتير دلوقتي إذا هيكمل ولا لأ.
كمان لمح إن في حسابات تانية بتدخل في قراره، زي المدارس، والنقل، والحياة اليومية، واللي مش سهلة على أي لاعب، خصوصًا لو معاه عيلة.
هل هيكمل في برشلونة ويعيش حلمه؟ ولا هيمشي على خطته القديمة ويكتفي بالسنة دي؟ الأيام الجاية هتحسم كل حاجة.
