قمة نار بين الأهلي والزمالك في سوبر أفريقيا لليد الليله
ماتش مولع مستني جمهور كرة اليد المصري النهارده، لما الأهلي هيقابل الزمالك في ديربي ناري بنص نهائي بطولة كأس السوبر الأفريقي، اللي هيتلعب في صالة الملك عبدالله الفيصل بمقر النادي الأهلي، الساعه 7 مساءً.
الفايز من اللقاء ده هيقابل المنتصر من مباراة الترجي التونسي ودرب السلطان المغربي، في النهائي اللي هيتلعب بكره، واللي هيحدد مين هيمثل أفريقيا في بطولة السوبر جلوب.
الزمالك داخل الماتش وعينه عالثار من الأهلي اللي سبق وكسبه في كل البطولات المحليه الموسم ده، وبيحاول يرجع هيبته من تاني ويوصل للعالميه الزمالك دعم فريقه بصفقات ناريه زي برانكو ويوسف معرف وبيجاد مروان.
في المقابل الأهلي مش ناوي يفرط في اللقب، خصوصًا إنه حامل اللقب من النسخه اللي فاتت، وكمان ضمن المشاركه في السوبر جلوب باعتباره منظم البطوله وبيسعى بقيادة مدربه مادسن، ومع عودة النجم علي زين وانضمام كاشباريك، لتحقيق الفوز وحسم الديربي.
الماتش هيتذاع على أون سبورتس وقناة الأهلي، والمعلق هيكون خالد خيري، فاستعدوا لموقعة ولا أجدعها نهائي.
