ليفركوزن يحط سعر خرافي لفيرتز والريال والسيتي بيتابعوا بصمت
نادي باير ليفركوزن الألماني قرر يرفع السقف عالي جدًا لما جات سيرة نجمه الشاب فلوريان فيرتز، واللي عامل موسم خرافي خلى كبار أوروبا تحط عينها عليه.
بحسب الصحفي ساشا تافولييري، ليفركوزن مش ناوي يفرّط في جوهرته بأي تمن، إلا لو التمن فعلًا خيالي. لو نادٍ من برا ألمانيا (ومش منافس مباشر) عايز اللاعب، السعر هو 100 مليون يورو ولكن لو بايرن ميونخ قرر يدخل على الخط؟ هنا السعر يقفز لـ 150 مليون يورو!
واضح إن ليفركوزن مش بس بيحافظ على نجمه، لكن كمان بيبعث رساله لبقية الأندية: “اللي عايز فيرتز، يدفع كويس.”
اللاعب عنده أرقام تتكلم لوحدها، شارك في 44 مباراة هالموسم، وسجل 16 هدف وصنع 15 تمريرة حاسمة، يعني تأثيره مش بس تهديفي، ده صانع لعب من طراز رفيع.
الاهتمام جاي من جهات تقيلة: ريال مدريد اللى دايمًا يحب يقتنص النجوم الصاعدين، ومانشستر سيتي اللى عنده مشروع طويل المدى، وحتى بايرن ميونخ مش ساكت وعايز ياخده ويقوي صفوفه.
هل هيكون فيرتز هو الصفقة الكبيرة لصيف 2025؟ ولا هيختار الاستمرار موسم كمان مع ليفركوزن؟ كل الطرق مفتوحة، لكن الأكيد إن اللاعب بقى على رادارات الصف الأول.
